جس نے کہ مے عشق سے اک جام نہ پایا

جس نے کہ مۓ عشق سے اِک جام نہ پایا
اس دوڑ میں اس نے تو کبھی نام نہ پایا
ہر ایک ہدایت کی نہایت ہے و لیکن
اس عشق کے آغاز کا انجام نہ پایا
کیا شکوہ کریں کنجِ قفس کا دلِ مضطر
ہم نے تو چمن میں بھی ٹک آرام نہ پایا
نہ رخ پہ نظر کی نہ کسی زلف کو دیکھا
کچھ ہم نے تو لطفِ سحر و شام نہ پایا
اس لب سے کسی بات کی کیا رکھئے توقع
جس لب سے کہ اک دن کبھی دشنام نہ پایا
چوں چیغ مسافر ہی رہے ہم نے تو ٹک چین
تجھ سے کبھی اے گردشِ ایام نہ پایا
جز بے سروسامانی حسنؔ ہم نے جہاں میں
افسوس!!!! کہ کچھ اور سر انجام نہ پایا

میر حسن دہلوی