گھر تو ہمارا شعلوں کے نرغے میں آ گیا

گھر تو ہمارا شعلوں کے نرغے میں آ گیا

لیکن تمام شہر اجالے میں آ گیا

یہ بھی رہا ہے کوچۂ جاناں میں اپنا رنگ

آہٹ ہوئی تو چاند دریچے میں آ گیا

اب تو محبتوں کا محبت سے دے جواب

میں خود سے ہار کر تِرے خیمے میں آ گیا

کچھ دیر تک تو اس سے مِری گفتگو رہی

پھر یہ ہوا کہ وہ مِرے لہجے میں آ گیا

آندھی بھی بچپنے کی حدوں سے گزر گئی

مجھ کو بھی لطف شمع جلانے میں آ گیا

ہونٹوں پہ غیبتوں کی خراشیں لیے ہوئے

یہ کون آئینوں کے قبیلے میں آ گیا

اظہر شکم کی آگ پہ قابو نہ پا سکا

وہ بھی غزل سنانے کو میلے میں آ گیا

اظہر عنایتی