ہر ذرے کی نمود میں اعلان جنگ ہے

ہر ذرے کی نمود میں اعلانِ جنگ ہے

دنیا نہیں ہے دوست یہ میدان جنگ ہے

اس سے شکست و فتح کا اندازہ کیجیے

حالت مِرے عدو کی جو دورانِ جنگ ہے

پھیلا ہوا ہے سرخ اجالا چہار سو

روشن لہو سے شمعِ شبستانِ جنگ ہے

بزدل کوئی نہ پیدا ہوا اس قبیل میں

سب سے بڑا تو ہم پہ یہ احسانِ جنگ ہے

سرحد پہ آج کل ہے تناؤ کی کیفیت

دونوں طرف کی خیر ہو امکانِ جنگ ہے

شمشیر، تیر، چھریاں، بھالے، تبر، حجر

یہ اور کچھ نہیں سر و سامانِ جنگ ہے

لبیک کہہ کے شاملِ تائید ہو رہو

وسعت پذیر حلقۂ دامانِ جنگ ہے

ہر سانس کھینچتا ہوں میں دشمن کے خوف میں

مشکل بہت ہے زندگی گزرانِ جنگ ہے

آزر مِرے عدو کو یہ تعلیم ہو نہ ہو

میں تو وہی کروں گا جو شایانِ جنگ ہے

دلاور علی آزر