عارفانہ کلام حمد نعت منقبت
آئی مہِ صیام کی انیسویں جو شب
کلثومؑ سے طعام علیؑ نے کیا طلب
وہ لائیں نانِ جو، نمک و شیر اور رُطَب
بیٹی سے تب علیؑ نے کہا از رہِ غضب
کیا چاہتی ہو تم کہ علیؑ پر عتاب ہو
محشر میں میرے واسطے طولِ حساب ہو
جس دن سے سُوئے خُلد سدھارے ہیں مصطفیٰؐ
دو نعمتیں کبھی نہیں کھائی ہیں ایک جا
کلثومؑ نے لیا رُطَب و شِیر کو اٹھا
حضرتؑ نے تین لقموں پہ بس اکتفا کیا
روئیں جو بیٹیاں تو کہا یہ زبان سے
ہے آرزو سُبک میں اُٹھوں اس جہان سے
افطار کر کے روزے کو مولائے روزہ دار
اُٹھے نمازِ شب کے لیے شاہِ ذوالفقارؑ
پھر تھا تمام رات عجب ان کو اضطرار
انگنائی میں علیؑ نکل آتے تھے بار بار
دل سُوئے حق تھا آنکھ سُوئے آسمان تھی
تھی سامنے اجل کہ شبِ امتحان تھی
میر انیس
No comments:
Post a Comment