فضائے حسن تخیل پہ چھا رہے ہیں علی

 عارفانہ کلام حمد نعت منقبت

فضائے حُسنِ تخیّل پہ چھا رہے ہیں علیؑ 

بمثلِ کعبہ مِرا دل سجا رہے ہیں علیؑ 

کہا ہے کعبے کی دیوار نے یہ ہنستے ہوئے 

خدا کے  گھر میں سُنا ہے کہ آ رہے ہیں علیؑ 

لحد کے گوشۂ تنہائی کے اندھیرے میں 

چراغِ نُورِ ولایت جلا رہے ہیں علیؑ

نبیؐ امام کو سینے سے ہیں لگائے ہوئے 

بہت ادب سے اِدھر مسکرا رہے ہیں علیؑ

محبتوں کا ہر اک سلسلہ اُن ہی سے ہے

نجف کو عشق کا مرکز بنا رہے ہیں علیؑ 

کہیں دلیلِ فصاحت ہے اِن کی گویائی

کہیں سُکوتِ بلاغت سُنا رہے ہیں علیؑ

وجودِ  میثمِ تمارؒ،۔ پیکرِ بو ذرؓ 

خوشا کہ نور کے سانچے بنا رہے ہیں علیؑ

 خدا شناس ہوئے ہیں وہ خود شناسی سے 

خود اپنے نفس کی قیمت لگا رہے ہیں علیؑ

تسنیم عابدی