اتنا خوشرنگ کہ خوابوں کا نگر لگتا ہے

 عارفانہ کلام حمد نعت منقبت

اتنا خوشرنگ کہ خوابوں کا نگر لگتا ہے

گنبدِ سبز سے یہ شہر گُہر لگتا ہے

پاؤں آقاؐ نے اِنہی گلیوں میں رکھے ہوں گے

پاؤں رکھتے ہُوئے ایمان سے ڈر لگتا ہے

پلکیں جھاڑُو کے تصور سے دمک اُٹھتی ہیں

راستہ آپﷺ کی گر راہ گُزر لگتا ہے

ہجر میں آپﷺ کے نمناک فقط آنکھ نہیں

خُون سے سینے میں اِک ٹکڑا بھی تر لگتا ہے

سنگ دل شخص پہ قرآن مؤثر کیوں ہے؟

سنگ ریزوں کی تلاوت کا اثر لگتا ہے

چھوڑ کر گردشی تسبیح ہُوا ہے دو نیم

عارف قصۂ معراج، قمر لگتا ہے

جو محمدؐ کا نہیں، دُنیا کو وہ جو بھی لگے

اہلِ کردار کو وہ صرف صِفر لگتا ہے

ہم بھی پردیس میں مر جانے سے ڈرتے ہیں حضورؐ

پر مدینے میں کسے موت سے ڈر لگتا ہے

معذرت اہلِ مدینہ یہ جسارت ہے مگر

ایک ہستی کے طفیل اپنا ہی گھر لگتا ہے

طاعتِ احمدِ مُرسلﷺ کا شجر دل میں لگا

اِس پہ جنت کی بشارت کا ثمر لگتا ہے

ناز ہو جس کو محمدﷺ کی غلامی پر قیس

آنکھ والوں کو وہی اہلِ نظر لگتا ہے

شہزاد قیس