چمکی ہے اسم نور سے لوح جبين دل

 عارفانہ کلام حمد نعت منقبت

چمکی ہے اسمِ نور سے لوحِ جبينِ دل

رشکِ صد آفتاب ہے شہرِ حسینِ دل

یادِ رسولِ پاکﷺ کا اللہ رے ارتباط

دل اس کا ہم نشیں ہے، وہ ہے ہم نشینِ دل

پھل پھول اس میں اُنؐ کی محبت کے ہیں فقط

شاداب جن کے دم سے ہوئی سر زمینِ دل

معراج کا اُسے کہاں ادراک ہو سکے

حاجب در نبیﷺ کا ہے روح الامینِ دل

اجڑا سا اک مکاں تھا، یہ اب لامکان ہے

جب سے حضورﷺ، آپ ہوئے ہیں مکینِ دل

میں بن گیا ہوں اُنﷺ کی عنایت کا آئینہ

صلِّ علىٰ عطیۂ نقشِ و نگین دل

دل ہے امینِ رحمتِ محبوبِ کبریاﷺ

محبوبِ کبریاﷺ کا کرم ہے امینِ دل

فریاد کیا کروں، مجھے غم ہی نہیں کوئی

یادِ حسیں ہوئی ہے جو اُنﷺ کی قرینِ دل

غواص کی تلاش میں گر کچھ خلوص ہے

پائے گا بحرِ مدح سے دُرِ ثمینِ دل

جب سے ہوئی ہے حبِ نبیؐ دل میں موجزن

اک ایک موئے تن ہے مِرا خوشہ چینِ دل

ہر لمحۂ حیات ہے محمود سومنات

جب تک بتوں سے پاک نہ ہو آستینِ دِل

راجا رشید محمود