یہاں تلک تو جبیں رُسوا کو سجدے اک در کے کام آئے
کیا جو رُخ میں نے سُوئے کعبہ تو بُت گروں سے سلام آئے
ہنسا نگاہوں میں باغ جنّت پہ دم میں نکلا سراب ہستی
طلب کے رستہ میں طالبوں کو بہت سے ایسے مقام آئے
ہو جس کو آنا، وہ آپ آئے، ہو جس کو جانا وہ آپ جائے
اب اپنی آنکھوں میں سب برابر وہ صبح ہو یا کہ شام آئے
ملا نہ آبِ حیات ہم کو، عبث رہا سر پہ خُم کا احساں
گئے تھے ساقی کے در پہ پیاسے، وہاں سے بھی تشنہ کام کے
بُرا ہو اے لذت اسیری! قصُور کیا زُلفِ خم بہ خم کا
جنہیں تن آسانیوں نے گھیرا، تڑپ کے خود زیرِ دام آئے
پہونچ کے بھی تیرے گھر میں تیری، طلب رہی ذوقِ جستجو کو
تُجھی کو گھبرا کے ہم پُکارے، حرم میں ایسے مقام آئے
نظر میں ان کی فُرات کیا ہے، پئے ہوں جو معرفت کے ساغر
نہ منہ لگائیں گے مرتے دم تک، جو بھر کے امرت کا جام آئے
ہزار نفریں اگر جُھکی ہو، جبیں کسی اور در پہ اپنی
کوئی تو سجدہ اس آستاں کا، ہمارے ارشاد کام آئے
نقی احمد ارشاد
No comments:
Post a Comment