عارفانہ کلام حمد نعت منقبت
غبارِ جاں ہے فدائے محمدﷺ عربی
اُڑی ہے لے کے ہوائے محمدﷺ عربی
وسیلہ کیا ہے سوائے محمدﷺ عربی
خدا بھی ہے تو خدائے محمدﷺ عربی
چمن حیات کا برسوں سے تھا خزاں دیدہ
بہار آئی جو آئے محمدﷺ عربی
حریمِ کعبہ، حِرا، عرش، منزلِ قوسین
مدارجِ کفِ پائے محمدﷺ عربی
حبیبِ خاصِ خدا و شفیعِ روز جزا
نہیں ہے کوئی سوائے محمدﷺ عربی
فسادِ کفر کے خوابِ گراں سے دنیا کو
جگا گئی ہے صدائے محمدﷺ عربی
لحد کی تیرہ شبی بزمِ نور بن جائے
نظر میں ہو جو لقائے محمدﷺ عربی
ہوں اُمتی مجھے خورشید حشر کا کیا غم
ہے سر پہ ظلِ لوائے محمدﷺ عربی
کبھی دیارِ مدینہ میں ہم بھی جائیں گے
صبا ہوئی جو رضائے محمدﷺ عربی
صبا اکبر آبادی
No comments:
Post a Comment