شہر بھر میں مجھے ایسے نہ گھمایا جاتا

 شہر بھر میں مجھے ایسے نہ گُھمایا جاتا

اس محبت کو تماشا نہ بنایا جاتا

میں کہ جس چاک پہ ٹُوٹا تھا تِرے ہاتھوں سے

کاش اس چاک پہ اب پھر سے بنایا جاتا

یاد رکھنے کی اذیت سے گُزرنے کے لیے

بھُولنے کا بھی ہُنر مجھ کو سکھایا جاتا

دُھوپ ہوتی تو مجھے اتنی سہولت رہتی

میں نہ جاتا بھی تو اس تک مِرا سایا جاتا

اک نئے زخم کی ہے دل کو ضرورت عدنان

اب پرانے سے نہیں کام چلایا جاتا

عدنان منور