ناگاہ کی نواسوں نے نانا سے التماس

 عارفانہ کلام حمد نعت منقبت

ناگاہ کی نواسوں نے ناناﷺ سے التماس

رنگیں جوڑے آج ہیں ہمجولیوں کے پاس

اور ہے سفید آپﷺ کے فرزندوں کا لباس

یہ سُن کے غرقِ فکر ہوئے شاہِ حق شناسؐ

خواہش جو رنگ کی ہوئی خیرالانامﷺ کو

اڑ اڑ کے رنگ چہرے سے آیا سلام کو

جبریلؑ مثلِ رنگ پریدہ فلک سے آئے

پیش نبیﷺ خدا کا یہ رنگیں کلام لائے

جُھک کر کہا حضورؐ ہیں کیوں اپنا سر جُھکائے

جو رنگ کہیے صانع قدرت ابھی دکھائے

حاکم ہو صُبح و شام کے خُورشید و ماہ کے

مالک ہو زرد و سُرخ و سفید و سیاہ کے

پوچھا نبیﷺ نے رنگ تو بولا وہ خُوش کلام

نانا میں رنگ سبز کا خواہاں ہوں والسلام

تب پانی ڈالنے لگے جبریلؑ نیک نام

شہ نے دیا فشار تو وہ سبز تھا تمام

اس پیرہن سے قدرِ زبرجد سوا ہوئی

ہر تار پر بہارِ زمرد فدا ہوئی

کی عرض جلد رنگیے نہ دیر اب لگائیے

مڑ کر رسولِﷺ حق نے کہا آگے آئیے

رنگتے ہیں ہم جمالِ مبارک دکھائیے

کس رنگ کا لباس ہو یہ تو بتائیے

ہنس کر کہا آلؑ کا درجہ بلند ہے

ہم کو تو سُرخ رنگ ازل سے پسند ہے

ابریق نے خمیدہ سرِ دست سر کیا

ظاہر وکیلِ حق نے پھر اپنا ہُنر کیا

حُلّہ جنابِ شاہِ شہیداںؑ کا تر کیا

قُدرت کے آب و رنگ نے اپنا اثر کیا

فورا نچوڑتے ہی نیا اس کا ڈھنگ تھا

حُلّہ نبیﷺ کے لالؑ کا یاقوت رنگ تھا

مشغول شُکر میں ہمہ تن پنجتنؑ ہوئے

اور سبز پوش خضرؑ کی صورت حَسنؑ ہوئے

گُلگوں قبا حُسینؑ بوجۂ حسن ہوئے

بیساختہ رسولﷺ خدا خندہ زن ہوئے

بولے کہ خوب حُلّہ نُور و ضیاء دئیے

قُدرت کے رنگ آج خُدا نے دکھا دئیے

مرزا دبیر

سلامت علی دبیر