خود کہہ رہا ہے سورۂ الحمد کا نصاب

 عارفانہ کلام حمد نعت منقبت

الحمد

خود کہہ رہا ہے سورۂ الحمد کا نصاب 

آیات شش جہات کی تلخیص ہے یہ باب 

اس سورۂ محیطِ بیاں سے عیاں ہے یہ 

سات آیتیں ہیں اصل میں دیباچۂ کتاب 

ہر شے رواں ہیں ان کی روانی کے درمیاں 

قرآں کُھلا ہے سبعِ مثانی کے درمیاں 

الحمد دل کشا ہے لبِ حمد ذوالجلال 

شرحِ نکاتِ حمد میں کیا قال کیا مقال 

اک حرفِ حمد بوجھ جو ڈالے زمین پر 

قطبِ زمیں سے اپنا توازن بھی ہو محال 

پیدا ہو دم زدن میں یہ صورت بگاڑ کی 

اڑ جائیں خود زمین سے میخیں پہاڑ کی 

رحمان تا رحیم مباحث بھی ہیں ادق 

جن کا نچوڑ یہ ہے پئے دفترِ ورق

رحمانیت صفت ہے جو اک لطف عام کی 

وصفِ رحیمیت ہے مگر خاص لطف حق 

یہ دہر جو کمال ہے اس امتیاز کا 

کیا آئینہ ہے دیکھ نشیب و فراز کا 

یہ راہِ مستقیم صراطِ مکاشفات 

اور آدمی ہے کاشفِ منزل پئے صفات 

ہر لمحہ اک صدا ہے یَتَفَکّرُون کی

ہر دم مقامِ غور ہے خود آدمی کی ذات 

صنفِ خذف میں مثلِ زمرُّد ہے آدمی 

اک پرتوِ صفاتِ خدا خود ہے آدمی 

کرنا ہے طے سفر جو مفکِّر کی آنکھ سے

پڑھنا ہے حاشیوں کو مفسِّر کی آنکھ سے

وہ رُخ کہ فلسفے کا گزر تک جہاں نہ ہو

اُن سب کو دیکھنا بھی ہے شاعر کی آنکھ سے

قرطاس پر سمیٹ کے ہر خطِّ راہ کو 

جانا ہے ماوراۓ نگہ بھی نگاہ کو

گردش بدل رہی ہے افق بھی جو صبح و شام 

ہر پل ہے ارتقا کی مسافت کا اہتمام 

یوں بھی ملے گی قطرہ آبی کو ابرو 

ہوگی نمی کی بوند بھی سورج سے ہم کلام 

آئی نہیں ہے حیرتِ حکمت کی حد ابھی 

سائے کا وزن تول رہی ہے خرد ابھی 

الحمد روشنی کے سفینے عیاں ہوئے 

بے مدعا بھی دل کے دفینے عیاں ہوئے 

ہر جنبشِ مژہ پہ اترنے لگی کرن 

جو تھے پسِ خبر وہ خزینے عیاں ہوئے 

گردوں بھی گرد چشم تحیُّر کے سامنے 

سیّارے رک گئے ہیں تصوُّر کے سامنے

ہلال نقوی