سمٹنے کا ہنر کیا جانتا ہے

 سمٹنے کا ہُنر کیا جانتا ہے؟

جو اے دل تُو بکھرنا چاہتا ہے

خبر تو ہے وہ ہرجائی بہت ہے

اُسی کافر کو دل یہ مانگتا ہے

گُزر جاتا ہے بن کر اجنبی وہ

نگاہیں پھر پلٹ کر ڈالتا ہے

اسی اُمید پہ زندہ ہوں اب تک

سُنا یہ ہے مقدر جاگتا ہے

جھٹک دیتی ہے اس کی بے رخی ہی

جو خوش فہمی ذرا دل پالتا ہے

پرندے باخبر رہنے لگے ہیں

شکاری جال جب جب ڈالتا ہے

عجب یہ وقت ہے جس میں کہ عشرت

مِرا سایا بھی مجھ سے بھاگتا ہے

شبانہ عشرت