صبر سے آراستہ تھا راستہ شبیر کا

 عارفانہ کلام حمد نعت منقبت سلام

صبر سے آراستہ تھا راستہ شبیرؑ کا

جا رہا تھا کربلا جب قافلہ شبیرؑ کا

تھک گیا میرا قلم اور مجھ کو نیند آنے لگی

میں مرتب کر رہا تھا مرتبہ شبیرؑ کا

کیسے ممکن ہے کہ مجھ کو چھو سکے کوئی یزید

کِھینچ کے رکھا ہے میں نے، دائرہ شبیرؑ کا

قدرتِ الله دیکھو ہے شہیدوں میں شمار

ایک دن روکا تھا جس نے راستہ شبیرؑ کا

آج تک تاریخ ثابت کر نا پائی کربلا

معجزہ زینبؑ کا تھا، کہ معجزہ شبیرؑ کا

کفر سے لڑنے کی دو ہی حکمتیں ہیں دین میں

ایک منصوبہ حسنؑ کا، دوسرا شبیرؑ کا

کیا ہمیں تولے گا کوئی، درہم و دینار سے

ہم کو مخمل سے ہے بڑھ کر، بوریا شبیرؑ کا

درد، جرأت، اشک، ماتم، حوصلہ، کردا، صبر

ہے میرے ترکش میں ہر دم، اسلحہ شبیرؑ کا

خاک اس زینبؑ کے آگے ٹھہرتا دربارِ شام

جرأتِ حیدرؑ تھی جس میں، حوصلہ شبیرؑ کا

خوف تھا عباسؑ کا لاحق یزیدی فوج کو

حضرتِ عباسؑ پر تھا، دبدبہ شبیرؑ کا

آج بھی کہتے نہیں تھکتے، یزید ابن یزید

اقتدار و سلطنت تھا، مسئلہ شبیرؑ کا

دے خدا توفیق، تو اے شیخ مَس کرنا کبھی

پرچمِ عباسؑ، یا پھر تعزیہ شبیرؑ کا

کیسے ممکن ہے کہ مدحِ شاہؑ لکھے جعفری

کیسے کر سکتا ہے کوئی، تجزیہ شبیرؑ کا

لیاقت جعفری