پیمبروں کے صحیفوں میں نور تجھ سے ہے

 عارفانہ کلام حمد نعت منقبت سلام

پیمبروں کے صحیفوں میں نور تجھؐ سے ہے

فلک پہ چاند ستاروں میں نور تجھ سے ہے

تیریﷺ حدیث خدا کی کتاب کی تفسیر

نماز اور اذانوں میں نور تجھ سے ہے

چمن چمن میں بھی، موجِ صبا میں بھی اے دل

افق، حسین نظاروں میں نور تجھ سے ہے

ہے مرغزار کی دلکش فضا میں بھی سن لو

چمن میں گُل میں بہاروں میں نور تجھ سے ہے

تِری ضیا سے منور ہیں دل محبّوں کے

نظر نواز فضاؤں میں نور تجھ سے ہے

ہے آفتابِ جہاں تاب بھی تِرا جلوہ

دمِ سحر بھی اجالوں میں نور تجھ سے ہے

تمہارے نور سے روشن، جبینِ عالم ہے

زماں زمن میں مکانوں نور تجھ سے ہے

تیرے جمال کا پرتو ہے حسنِ فطرت میں

گلوں میں اور شگوفوں میں نور تجھ سے ہے

تمہاری ذات سے ابرارﷺ سب جِلا پائیں

کتابِ علم و ہدایت میں نور تجھ سے ہے

یہ حق ہے اور حقیقت کہ آج زینب کے

شعور و فکر، خیالوں میں نور تجھ سے ہے

سیدہ زینب سروری قادری