عارفانہ کلام حمد نعت منقبت سلام
زینبِؑ خستہ جگر کا منہ تھا اس کی یال پر
لیتی تھی کلثومؑ گھوڑے کی بلائیں سر بسر
کہتی تھی بانو رکابوں سے لگا کر چشمِ تر
میرا والی ہے کہاں اسوار تیرا ہے کدھر
بیچ میں گھوڑے کو لے کر ایک حشر کا عالم ہوا
بیبیوں میں پہلے حلقہ باندھ کر ماتم ہوا
پیٹنے سے جب کہ بیووں کے قیامت ہوگئی
ناگہاں عابدؑ نے اپنی آنکھ غش سے کھول دی
بولا یوں چلا کے وہ بیمار اے زینبؑ پھوپھی
پیٹتے ہیں سب یہ لاش آئی ہے کس مظلوم کی
رو کے بولی وہ تیرے باباؑ نے سر کٹوایا ہے
گھوڑا خالی سبطِ پیمبرﷺ کا رن سے آیا ہے
سن کے یہ رونے لگا بیمارِ دشت کربلا
مادر باقرؑ سے فرمایا کہ لا میرا عصا
زوجۂ بیمار نے لا کر عصا جس دم دیا
تب عصا کو تھام کر اٹھا وہ غم کا مبتلا
کلمۂ تکبیر کو با چشمِ تر کہتے ہوئے
پاس گھوڑے کے گئے ہائے پدر کہتے ہوئے
دلگیر لکھنوی
لالہ چھنو لال دلگیر
No comments:
Post a Comment