دل میں ہے خیال رخ نیکوئے محمد

 عارفانہ کلام حمد نعت منقبت

دل میں ہے خیال رخ نیکُوئے محمدﷺ

اللہ کے گھر میں ہے بسی بُوئے محمدﷺ

کیا رنگ تصور ہے کہ ہر سانس سے مل کر

آتی ہے ہوائے چمن کُوئے محمدﷺ

لے جائے اجل جان کی پروا نہیں مجھ کو

ہے تار رگ جاں مجھے ہر سُوئے محمدﷺ

آ جائے نظر راہ میں گر نقشِ کفِ پا

آنکھوں سے چلوں میں طرف کُوئے محمدﷺ

تولا ہے بہت جانچ کے ارباب نظر نے

ہیں شمس و قمر سنگ ترازُوئے محمدﷺ

دلبر ہے، دل آرام ہے، دلدار ہے وہ دل

جس دل میں ہے یاد رُخ دلجُوئے محمدﷺ

سینے سے لگاؤں میں امیر آنکھوں میں رکھوں

ہیں پُھول مجھے خار و خس کُوئے محمدﷺ

امیر مینائی