لاریب کہ الله تعالیٰ تو نے

 عارفانہ کلام حمد نعت منقبت سلام

لا ریب کہ الله تعالیٰ تُو نے

بندے کو بڑے عیش سے پالا تُو نے

لغزش ہوئی جب بھی تو سنبھالا تُو نے

میرا ہر اک ارمان نکالا تُو نے

امروہے کے پھر جلوے کیے ہیں میں نے

اک پھیرے کے دو عشرے کیے ہیں میں نے

ہاں شکر خدائے دو جہاں ہے مجھے زیب

اس ذات سے جو ذات ہے قطعاً بے عیب

میری مدد ہو جاتی ہے من جانب غیب

صدقے میں حسینؑ ابن علیؑ کے لاریب

یاروں سے ملا دیا ہے مالک تُو نے

امروہہ دکھا دیا ہے مالک تُو نے

ہر ساز اور سامان میں تبدیلی ہے

پالٹ میں اور دالان میں تبدیلی ہے

کب لوگوں کے ایمان میں تبدیلی ہے

مولا کی کہاں شان میں تبدیلی ہے

بگلوں کا عزا خانہ ہے بالکل ویسا

بتیس برس پہلے تھا چھوڑا جیسا

اونٹوں کا وہی نظام الله الله

آرائش کا احتشام الله الله

دلدل کا وہ احترام الله الله

مولا پہ پھر وہ سلام الله الله

حق لکھتے ہیں جو ایسے قلم آتے ہیں

لکڑوں میں بذریہ سے علم آتے ہیں

ہر طول بلد عرض بلد میں مجھ کو

امروہے کی رکھتی تھی عدد میں مجھ کو

اک کشمکش جد و جہد میں مجھ کو

جس جا گیا اس شہر کی حد میں مجھ کو

شاہراؤں پہ بے حد ہی تو تڑپاتیں تھیں

امروہے کی گلیاں مجھے یاد آتی تھیں

یہ شاہ ولایت کی زمیں ہے اے دوست

دنیا میں جواب اس کا نہیں ہے اے دوست

درگاہ بھی حضرت کی یہیں ہے اے دوست

جس جا ہے وہ آراضی حسیں ہے اے دوست

کیسا ہے بتاؤں وہ زمیں کا ٹکڑا

دھرتی پہ ہے فردوس بریں کا ٹکڑا

رخسارہ گیتی پہ سجل امروہہ

امروہے کے لوگوں کا ہے دل امروہہ

دل ہے اگر آب تو گل امروہہ

لکھنو جو بندی ہے تو تل امروہہ

امروہہ پہ دو شہر دل آرا بخشوں

بس ہو تو سمرقند و بخارا بخشوں

دکھلاؤ تو علم کے کنارے یارو

مجلس کے جلوس کے نظارے یارو

میں شہر میں آیا ہوں تمہارے یارو

پیارے یارو ، میرے پیارے یارو

طفلی میں علم بھی میں بناتا تھا یہاں

ٹاٹل کے قلم بھی ميں بناتا تھا یہاں

پھر نام ولی ابن ولی لکھتا تھا

کاغذ پہ حسینؑ ابن علیؑ لکھتا تھا

یہ نام میں پڑھ پڑھ کے جلی لکھتا تھا

منہ میں لیے مصری کی ڈلی لکھتا تھا

اس نام کو کب خانۂ یاقوت میں آج

لکھتا ہوں نہاں خانۂ لاہوت میں آج

کھل جاتا ہوں جب من کی کلی لکھتا ہوں

یہ وہ ہے قلم جس سے علیؑ لکھتا ہوں

اور ان کو محمدﷺ کا ولی لکھتا ہوں

قرآن کی آیات جلی لکھتا ہوں

کس کے ہیں یہ سب طور میرے پردے میں

لکھتا ہے کوئی اور میرے پردے میں

اس نام کو سنتے ہی چمکتے ہیں قلوب

مشرق مغرب شمال اور جنوب

یہ نام یہ شخصیت ہے ہم کو محبوب

لکھنے پڑھنے میں اور سننے میں بھی خوب

ح س جو ہوں دال تو دین اس کو پڑھو

گر پیش نہ ڈالو تو حسینؑ اس کو پڑھو

خط میرا ہوا سارے جہاں میں مقبول

آیات جمال کا ہے خامے پہ نزول

علم ِ معقول ہو کہ علمِ منقول

مولا کے کرم کا بھی نہیں کوئی اصول

مولا کا کرم کس پہ ہے، مجھ جیسے پر

نازل یہ قلم کس پہ ہے، مجھ جیسے پر

یہ نام حسینؑ بھی وحی ہے گویا

اس نام کا کردار بہت ہے اعلیٰ

اعلی سے بھی اعلیٰ ہے بہت ہے بالا

یہ اسم گرامی ہے خدا نے رکھا

الہام کی یوں جان ہے نام نامی

دل والوں کا ایمان ہے نام نامی

پیاسے ہیں مگر مالک زمزم ہیں حسینؑ

لاریب بہ فیہ فخر دو عالم ہیں حسینؑ

ناز خدا و نازش آدم ہیں حسینؑ

ہیں نور خدا، خیر مجسم ہیں حسینؑ

ہے ظلمت کفر، شر کا پتلا ہے یزید

ہر صورت باطل کا چہیتا ہے یزید

صادقین امروہوی

صادقین احمد نقوی