جب کہ مارے گئے دریا کے کنارے عباس

 عارفانہ کلام حمد نعت منقبت سلام

جب کہ مارے گئے دریا کے کنارے عباسؑ

اب نہیں تشنگی کوثر کو سدھارے عباسؑ

شہؑ نے فرمایا کہ ہے ہے مِرے پیارے عباسؑ

اب نہ جینے کا مزہ غم میں تمہارے عباسؑ

سچ تو یہ ہے جو تمہیں ہاتھ سے کھویا میں نے

زندگانی کا مزہ ہاتھ سے کھویا میں نے

واہ کیا بات ہے اے عاشق شیدا میرے

یہ جو کچھ تُو نے کیا تھا یہی لائق تھا تیرے

شمر نے چاہا بہت مجھ سے تِرا دل پھیرے

رشتہ ثابت کیا، لالچ بھی دئیے بہتیرے

لاکھ کہتا رہا وہ پر کوئی تُو مانتا تھا

اب جو کچھ تُو نے کہا پہلے ہی میں جانتا تھا

دلگیر لکھنوی

لالہ چھنو لال دلگیر