عارفانہ کلام حمد نعت منقبت سلام
حلقۂ کُفر سے یوں حُرِ دلاور نکلے
جس طرح آبِ رواں کاٹ کے پتھر نکلے
جن کے چہروں پہ بظاہر تھی شریعت کی نقاب
آستینوں میں چُھپائے ہوئے خنجر نکلے
آخری خطبۂ شبیرؑ سے رن کانپ اٹھا
لب کے الفاظ کہ شمشیر سے جوہر نکلے
مال اسلام نے بانٹا تو ہزاروں آئے
خون اسلام نے مانگا تو بہتّر نکلے
آج تک فیضِ حسینؑ ابنِ علیؑ جاری ہے
قطرے قطرے کو جو ترسے وہ سمندر نکلے
ہم سے عاجز سے ادا ہو نہ سکا مدح کا حق
لفظ ہر رنگ میں جذبات سے کم تر نکلے
اس کو کہتے ہیں مقدر کی بلندی ساغر
حُر کا دم زانوئے شبیرؑ کے اوپر نکلے
ساغر مہدی
No comments:
Post a Comment