عارفانہ کلام حمد نعت منقبت سلام
اے بدخشانِ نبیؐ کے لعلِ احمر السّلام
اے گلستانِ علیؑ کے لالۂ تر السلام
ایک ساعت ہی میں اُمت پِھر گئی نانا کی سب
کیا قیامت لائی تیرے سر کے اوپر السلام
بُوند بھر پانی نہ دریا پر تجھے پینے دیا
اے تمنائے دلِ ساقئ کوثر السلام
سب کنارے لگ گئے تو بحرِ خُوں میں غرق ہے
اے کنارِ مصطفیٰﷺ کے ناز پرور السلام
تُو تو شاہِ دِیں تھا، ایسا ہو کے، بے کس کیوں ہوا
اب نہ تن پر سر ہے نے سر پر ہے افسر السلام
بات کو بے پردہ کہیے کس طرح اب ہائے ہائے
ہیں حرم کے لوگ اب محتاجِ چادر السلام
کیا ستم کشیاں بیاں تیری کرے دل خستہ میر
نام تیرا سن کے آنکھیں ہوتی ہیں تر السلام
میر تقی میر
No comments:
Post a Comment