اے کہ ترے جلال سے ہل گئی بزم کافری

 عارفانہ کلام حمد نعت منقبت

شمعِ ہدایت​

​

اے کہ تِرے جلال سے ہِل گئی بزمِ کافری​

رعشۂ خوف بن گیا رقصِ بُتانِ آذرِی​

خُشک عرب کی ریگ سے لہر اُٹھی، نیاز کی​

قُلزمِ نازِ حُسن میں، اُف ری تِری شناوری​

اے کہ تِرا غُبارِ راہ، تابشِ رُوئے ماہتاب​

اے کہ تِرا نشان پا، نازِشِ مہرِ خاوری

​اے کہ تِرے بیان میں، نغمۂ صُلح و آشتی​

اے کہ تِرے سُکوت میں، خندۂ بندہ پروری​

اے کہ تِرے دماغ پر جُنبشِ پرتَوِ صفاء​

اے کہ تِرے خمیر میں، کاوشِ نور گُستری​

چھین لیں تُو نے مجلسِ شرک و خودی سے گرمیاں​

ڈال دی تُو نے پیکرِ لات و ہُبل میں تھرتھری​

تیرے قدم پہ جبہ سا روم و عجم کی نخوتیں​

تیرے حضور سجدہ ریز، چین و عرب کی خودسری​

تیرے کرم نے ڈال دی طرحِ خلوص و بندگی​

تیرے غضب نے بند کی رسم و رہِ ستمگری​

تیرے سخن سے دب گئے لاف و گزاف کفر کے​

تیرے نفس سے بُجھ گئی آتشِ سحر سامری​

لحن سے تیرے منتظم پست و بلند کائنات​

ساز سے تیرے مُنضبِط، گردشِ چرخ چنبری​

چینِ ستم سے بے خبر تیری جبینِ دلکشی​

حرفِ وفا سے تابناک تیری بیاضِ دلبری​

تیری پیمبری کی یہ سب سے بڑی دلیل ہے​

بخشا گدائے راہ کو تُو نے شکوہِ قیصری​

بھٹکے ہوؤں پہ کی نظر، رشکِ خضر بنا دیا​

راہزنوں کی دی نِدا بن گئے شمعِ رہبری​

سلجھا ہوا تھا کس قدر تیرا دماغِ حق رسی​

پگھلا ہوا تھا کس قدر تیرا دل پیمبری​

چشمہ تیرے بیان کا غارِ حِرا کی خامُشی​

نغمہ تِرے سکوت کا نعرۂ فتح خیبری​

رمزمہ تیرے ساز کا لحنِ بلال حق نوا​

صاعقہ تیرے ابر کا لرزشِ روحِ بوذری​

آئینہ تیرے خُلق کا، طبعِ حسن کی سادگی​

جذبہ تِرے عُروج کا آلِ عباؑ کی برتری​

جھلکیاں تیرے ناز کی جنبشِ کاکُلِ حُسین​

رنگ تِرے نیاز کا گردشِ چشم جعفری​

شان تِرے ثبات کی عزمِ شہید کربلا​ؑ

شرح تِرے جلال کی ضربتِ دستِ حیدری​ؑ

رنگ تِرے ثباب کا جلوۂ اکبرؑ قتیل​

نقش تِرے شکیب کا خُونِ گلوئے اصغر​ؑی

تیرا لباسِ فاخِرہ چادرِ کُہنۂ بتُولؑ​

تیری غذائے خوش مزانانِ شعیرِ حیدریؑ​

تجھ پہ نثار جان و دل، مُڑ کے ذرا یہ دیکھ لے​

دیکھ رہی ہے کس طرح، ہم کو نگاہِ کافری​

تیرے گدائے بے نوا، تیرے حضور آئے ہیں​

چہروں پہ رنگِ خستگی، سینوں میں دردِ بے پری​

آج ہوائے دہر سے ان کے سروں پہ خاک ہے​

رکھی تھی جن کے فرق پر تُو نے کلاہِ سروری​ؐ

تیرے فقیر، اور دیں کوچۂ کفر میں صدا​

تیرے غلام اور کریں اہلِ جفا کی چاکری​

طرفِ کُلہ میں جن کے تھے لعل و گُہر ٹکے ہوئے​

حیف اب اُن سروں میں ہے دردِ شکستہ خاطری​

جتنی بلندیاں تھیں سب ہم سے فلک نے چھین لیں​

اب نہ وہ تیغِ غزنوی، اب نہ وہ تاجِ اکبری​

اُٹھ کہ تیرے دیار میں پرچمِ کُفر کُھل گیا​

دیر نہ کر کہ پڑ گئی صحنِ حرم میں ابتری​

خیز و دلِ شکستہ را، دولتِ سوز و ساز دہ​

مُسلم خستہ حال را، رُخصتِ تُرکتاز دہ​

جوش ملیح آبادی