عارفانہ کلام حمد نعت منقبت سلام
عشقِ نبیﷺ میں جب سے قمر مبتلا ہوا
حیرت سے پوچھتی ہے خِرد دل سے کیا ہوا
پروردگار شوق سے مُشکل کشا ہوا
دل کی زباں سے نامِ علیؑ جب ادا ہوا
آیا ہے رازِ کن فیکوں کُھل کے سامنے
جونہی درِ رسولِ خداﷺ مجھ پہ وا ہوا
آ جا، بُلا رہی ہے تجھے راہِ مستقیم
توبہ کا در ہے شامِ ابد تک کُھلا ہوا
پیکر کو گویا سائے کی حاجت نہیں رہی
پل بھر علیؑ نہ قُربِ نبیﷺ سے جُدا ہوا
یہ امتیاز معجزۂ حق سے کم نہیں
خونِ حسینؑ باعثِ خاکِ شفا ہوا
نُورِ شبِ چہار دہم کی قسم، قمر
جب سے ہوا دو نیم تو روشن سوا ہوا
قمر زیدی
No comments:
Post a Comment