عارفانہ کلام حمد نعت منقبت سلام
مصداق حرفِ آیۂ تطہیر ہیں حسینؑ
مرآۃ لا الہ کی تنویر ہیں حسینؑ
آئینہ استعانت صبر و صلوٰۃ کا
آیات بینات کی تفسیر ہیں حسینؑ
مظہر ہیں سر آیۂ ذبحِ عظیم کا
اک لازوال خواب کی تعبیر ہیں حسینؑ
سیرت میں خُلق سرورِ کونینﷺ کی شبیہ
صورت میں بھی حضورؐ کی تصویر ہیں حسینؑ
ریحان و روحِ گلشن سلطان دو جہاںﷺ
خوشبوئے خُلدِ عدن کی تشہیر ہیں حسینؑ
پردیس میں ہر ایک غریب الوطن کا ناز
تشنہ لبی کی دہر میں توقیر ہیں حسینؑ
سیراب کر دیا چمنِ دِینِ مصطفٰیﷺ
تا حشر روحِ نعرۂ تکبیر ہیں حسینؑ
حاصل ہے مجھ کو بیعتِ شبیرؑ کا شرف
شہزاد میں مرید ہوں اور پیر ہیں حسینؑ
شہزاد مجددی
No comments:
Post a Comment