سر حسین سناں پہ جدھر سے گزرا ہے

 عارفانہ کلام حمد نعت منقبت سلام

سرِ حسینؑ سِناں پہ جِدھر سے گُزرا ہے

خدا کا نام اسی رہ گزر سے گزرا ہے

نبیؐ کے فرش سے عرشِ بریں کے پردے تک

علیؑ ہر اک مقامِ خبر سے گزرا ہے

نہیں ہے اب کوئی معراجِ مصطفیٰؐ میں گماں

بشر کا قافلہ شہرِ قمر سے گزرا ہے

یزید بچ نہیں سکتا کہ صبر کا سیلاب

فصیل توڑ کے دیوار و در سے گزرا ہے

وہ ایک پیاسا مسافر وفا کی منزل سے

وہ اپنے پاؤں نہیں اپنے سر سے گزرا ہے

ہمیشہ دیکھ کے پانی کو رو دئیے عابدؑ

نہ جانے کیسا نظارہ نظر سے گزرا ہے

کھنڈر یہ کہتے ہیں کُوفے کے انقلاب کے بعد

حرم کا قافلہ شاید ادھر سے گزرا ہے

ہر ایک طالبِ عرفان و آگہی ساغر

دیارِ دِینِ محمدؐ کے در سے گزرا ہے

ساغر خیامی