تم ہو معراج وفا اے کشتگان کربلا

 عارفانہ کلام حمد نعت منقبت سلام

تم ہو معراجِ وفا، اے کشتگانِ کربلا

ورنہ، آساں تو نہیں تھا امتحانِ کربلا

ہر کہانی جس نے لکھی ہے ازل سے آج تک

وہ بھی رویا ہو گا سُن کر داستانِ کربلا

دودھ کی نہریں بھی قُرباں، حوضِ کوثر بھی نثار

اِک تمہاری پیاس پر، اے تشنگانِ کربلا

کتنا خوش قسمت ہے میرا دل بھی، میری آںکھ بھی

یہ ثناء خوانِ نبیﷺ، وہ سوز خوانِ کربلا

بے کسی کی لاج رکھ لی اور فارس ہو گئے

چارۂ بے چارگاں، بے چارگانِ کربلا

رحمان فارس