علی المرتضیٰ شیر خدا ہیں

 عارفانہ کلام حمد نعت منقبت سلام

علیؑ المرتضیٰؑ شیرِ خدا ہیں

کہ اُن سے خوش حبیبِ کبریا ہیں

اگر کمزور ہوں تو غم نہیں ہے

مُمِد میرے علیؑ مشکل کشا ہیں

یہی ہیں والدِ شبیرؑ و شبرؑ

یہی سرتاجِ بنتِ مصطفیٰؐ ہیں

نجف ہے آئینہ بردار اِن کا

یہیں تو حق نما شیرِ خدا ہیں

علیؑ کی رفعتیں اللہ اکبر

علیؑ علمِ نبیؐ کا آئینہ ہیں

عجب ضو ہے مِری نظروں میں خاکی

مرے دِل میں علیؑ جلوہ نما ہیں

عزیزالدین خاکی