ہمت جنبش لب کہاں میں کہاں مدح زینب کہاں

 عارفانہ کلام حمد نعت منقبت سلام

ہمتِ جُنبشِ لب کہاں

میں کہاں مدحِ زینبؑ کہاں

وہ تو گُفتارِ زینبؑ میں تھا

لہجۂ مرتضیٰؑ اب کہاں

ان کے دربارِ دُربار میں

جرأتِ عرضِ مطلب کہاں

وہ تو کہیے انہیں علم ہے

چاہیے کس کو، کیا، کب، کہاں

صرف طاری ہیں تاریکیاں

قید میں دن کہاں شب کہاں

یہ امیرانِ دربارِ شام

مرتبہ دانِ زینبؑ کہاں

ارضِ طیبہ، نجف، کربلا

باغِ جنت میں یہ سب کہاں

سر پہ ہو ان کے قدموں کی دھول

ساجد اپنا یہ منصب کہاں

ساجد امروہوی

مرزا ساجد حسین