ذکر شبیر تو ہے لفظ و بیاں سے آگے

 عارفانہ کلام حمد نعت منقبت سلام

ذکرِ شبیرؑ تو ہے لفظ و بیاں سے آگے

دل کا غم لے کے بڑھو آہ و فغاں سے آگے

وہی کر سکتا ہے عرفانِ حسینؑ ابن علیؑ

دیکھ سکتا ہے جو ہر خطرۂ جاں سے آگے

اِس حقیقت کو سمجھتا ہے شہیدوں کا لہو

کِن بہاروں کا سماں ہے رگِ جاں سے آگے

پوچھیے عابدِؑ بیمار سے، کیسے گزرا

ناتواں منزلِ ہر تاب و تواں سے آگے

کیسے آ سکتی تھی اسلام کے دل پر کوئی آنچ

علیؑ اکبرؑ کا جو سینہ تھا سِناں سے آگے

کچھ نہ پوچھو ہوسِ عرضِ ہنر اے مشکور

خاک اُڑتی ہے تمنائے بیاں سے آگے​

​

مشکور حسین یاد