ایسا نہیں کہ ان سے محبت نہیں مجھے

 ایسا نہیں کہ ان سے محبت نہیں مجھے

افشائے رازِ عشق کی جرأت نہیں مجھے

جلوے ہیں ان کے نو بہ نو میری نگاہ میں

اب ان کو غم یہ ہے غمِ فرقت نہیں مجھے

رکھنا ہے ان کے پاؤں پہ جا کر سرِ نیاز

رُک جا اجل کیا اتنی بھی مہلت نہیں مجھے

ہوتی ہے ان سے پہروں تصور میں گُفتگو

سوچوں کچھ اور اتنی بھی فُرصت نہیں مجھے

رُسوا جہاں میں کر دیا اس جذبِ شوق نے

مقصود ورنہ عشق میں شہرت نہیں مجھے

اس درجہ جُھوٹ سُنتا رہا ہوں تمام عمر

سُننے کی سچ بھی اب کوئی عادت نہیں مجھے

اب ان سے حال دل میں بیاں سوز کیا کروں

اپنی زبان پر بھی تو قُدرت نہیں مجھے

ڈاکٹر سردار سوز