میرے آقا جسے اک جام پلا دیتے ہیں

 عارفانہ کلام حمد نعت منقبت

میرے آقاﷺ جسے اک جام پلا دیتے ہیں

اس کے خوابیدہ مُقدر کو جگا دیتے ہیں

جس کو سرکارﷺ دِکھاتے ہیں جمالِ انور

اس کی آنکھوں سے حجابات اُٹھا دیتے ہیں

جس پہ اندازِ کریمی سے نظر کرتے ہیں

دل سے عصیاں کی سیاہی کو مِٹا دیتے ہیں

دے کے پیغام خُدا حُسنِ عمل سے اپنے

راہ گُم کردوں کو خالق سے مِلا دیتے ہیں

فیضِ صُحبت سے بدل دیتے ہیں دل کی دُنیا

سچ تو یہ ہے کہ وہﷺ انسان بنا دیتے ہیں

درس دے کر وہ محبّوں کو صِلہ رحمی کا

زندگی کے انہیں آداب سِکھا دیتے ہیں

راہ میں اُن کی بِچھاتے ہیں جو خار و پتھر

بدلہ لینے کے عِوض اُنؐ کو دُعا دیتے ہیں

اپنے جلووں سے سکندر وہ لحد میں آ کر

قبرِ تاریک کو پُر نُور بنا دیتے ہیں

سکندر لکھنوی