عارفانہ کلام حمد نعت منقبت
میرا خُدا وہی ہے
یہ کائنات جس نے تخلیق کی عدم سے
قائم ہے نظمِ ہستی جس ذات کے کرم سے
نورِ ازل سے جس کے دنیا میں روشنی ہے
میرا خُدا وہی ہے، میرا خُدا وہی ہے
سب کی ضرورتوں کا سامان کرنے والا
سارے جہاں پہ اپنا احسان کرنے والا
جس کے کرم سے سب کی بگڑی بنی ہوئی ہے
میرا خدا وہی ہے، میرا خدا وہی ہے
ہر ایک شے جہاں کی لیتی ہے نام جس کا
دیتا ہے ذرّہ ذرّہ ہم کو پیام جس کا
کاریگری ہے جس کی خشکی ہے یا تری ہے
میرا خدا وہی ہے،۔ میرا خدا وہی ہے
آغاز جس کا کوئی، نہ اختتام جس کا
عقل و حواس سے ہے اونچا مقام جس کا
ہے جس کی جستجو میں عامی کہ فلسفی ہے
میرا خدا وہی ہے،۔ میرا خدا وہی ہے
پیغام مصطفیٰﷺ نے جس کا ہمیں سنایا
قرآن نے جہاں کو جس کا پتا بتایا
وہ جس کی بندگی میں دنیا کی زندگی ہے
میرا خدا وہی ہے،۔ میرا خدا وہی ہے
دلدار احمد علوی
No comments:
Post a Comment