پھر چلا خامہ قصیدہ کی طرف بعد غزل

عارفانہ کلام حمد نعت منقبت

پھر چلا خامہ قصیدہ کی طرف بعدِ غزل

کہ ہے چکر میں سخن گو کا دماغِ مختل

مے گُلرنگ ہے کیا شمعِ شبِ فکر کا پُھول

چلتے چلتے جو قلم ہاتھ سے جاتا ہے نکل

چھینٹے دینے سے نہ محفوظ رہی قُلزم و نیل

نہ بچا خاک اُڑانے سے کوئی دشت و جبل

کہیں طُوبٰی، کہیں کوثر، کہیں فردوسِ بریں

کہیں بہتی ہُوئی نہرِ لبن و نہرِ عسل

کہیں جبریلؑ حکومت پہ کہیں اسرافیل

کہیں رِضواں کا کہیں ساقئ کوثر کا عمل

باغِ تنزیہ میں سر سبز نہالِ تشبیہ

انبیاء جس کی ہیں شاخیں عرفا ہیں کوپل

گُلِ خُوش رنگ رسولِ مدنی عربیﷺ

زیب دامانِ ابد طُرّۂ دستارِ ازل

ہفت اقلیمِ ولایت میں شہِ عالی جاہؐ

چار اطرافِ ہدایت میں نبئ مُرسلؐ

منتخب نسخۂ وحدت کا یہ تھا روزِ ازل

کہ نہ احمدﷺ کا ہے ثانی نہ احد کا اوّل

دورِ خُورشید کی بھی حشر میں ہو جائے گی صبح

تا ابد دورِ محمدﷺ کا ہے روزِ اوّل

محسن کاکوروی