عارفانہ کلام حمد نعت منقبت
گُلِ خُوش رنگ رسولِ مدنی العربیؐ
زیبِ دامانِ ابد،۔ طرۂ دستارِ ازل
نہ کوئی اس کا مشابہ ہے نہ ہمسر نہ نظیر
نہ کوئی اس کا مماثل، نہ مقابل، نہ بدل
اوجِ رفعت کا قمر، نخلِ دو عالم کا ثمر
بحرِ وحدت کا گہر، چشمۂ کثرت کا کنول
مہر توحید کی ضَو اوجِ شرف کا مہِ نَو
شمعِ ایجاد کی لَو، بزمِ رسالت کا کنول
مرجع روحِ امیںؑ، زیب دہِ عرشِ بریں
ہفت اقلیم ولایت میں شہِ عالی جاہﷺ
چار اطراف ہدایت میں نبی مُرسلﷺ
شب اسریٰ میں تجلی سے رخِ انورؐ کی
پڑ گئی گردنِ رفرف میں سنہری ہیکل
افضلیت پہ تِریﷺ مشتمل آثار و کتب
اولیت پہ تِریﷺ متفق ادیان و ملل
مرجعِ روحِ امیں، زیب دہِ عرشِ بریں
حامئ دینِ متیں،۔ ناسخِ ادیان و ملل
کبھی ڈُوبی، کبھی اُچھلی، مہِ نَو کی کشتی
بحرِ اخضر میں طلاطم سے پڑی ہے ہلچل
محسن کاکوروی
No comments:
Post a Comment