عارفانہ کلام حمد نعت منقبت
رحمت کے دربار سجائے جاتے ہیں
آج زمیں پر عرش بِچھائے جاتے ہیں
آج وہ وجہِ خلقت جگ میں آیا ہے
جس کے لیے ہم لوگ بنائے جاتے ہیں
اسمِ نبیﷺ کا وِرد پکانا پڑتا ہے
صحرا میں یوں پُھول کِھلائے جاتے ہیں
بھر بھر کے جنت میں سارے نبیوں کو
عشقِ نبیﷺ کے جام پِلائے جاتے ہیں
محوِ حیرت دُنیا سُن لے عرش پہ بھی
آقاﷺ کے میلاد منائے جاتے ہیں
اُن میں سے پہلا دھرتی پہ اُترا ہے
آدم کو جو نام سِکھائے جاتے ہیں
رات گئے تاروں کی جگمگ محفل میں
آقاﷺ کے فرمان سُنائے جاتے ہیں
دہلیزِ احمدﷺ کی طاہر مٹی سے
میثم اور سلمان بنائے جاتے ہیں
جسم کا سایہ کب ہے لیکن آقاﷺ کے
عرش تلک رحمت کے سائے جاتے ہیں
آقاﷺ کی خیرات سمجھتا ہوں حسنین
مجھ سے جو الفاظ لِکھائے جاتے ہیں
حسنین اکبر
No comments:
Post a Comment