توانا رکھتی ہے ہر آن آرزوئے رسول

 عارفانہ کلام حمد نعت منقبت

توانا رکھتی ہے ہر آن آرزُوئے رسولﷺ

نڈھال ہونے نہیں دیتی جستجُوئے رسولﷺ

تمام دعوے محبت کے میرے ناقص ہیں

جو میرے طرزِ عمل سے نہ جھلکے خُوئے رسولؐ

مرے لیے ہیں یہ عنبر یہ مشک بے معنی

مجھے تو رکھتی ہے سرمست ایک بُوئے رسولؐ

اِدھر اُدھر کے جھمیلوں میں کھو نہ جا اے دل

تِرا سفر ہے مِرے دوستدار سُوئے رسولﷺ

فضائے قلب و نظر عطر بیز ہے جس سے

تمام عطر جہاں کے فدائے بُوئے رسولﷺ

مجھے جہان سے دلدار کوئی کام نہیں

مِری تو منزلِ ہستی ہے ایک کُوئے رسولؐ

دلدار احمد علوی