ملتے نہیں ہیں ایسے خزانے ادھر ادھر

 ملتے نہیں ہیں ایسے خزانے اِدھر اُدھر 

ہم ڈھونڈنے ہیں یار پرانے اِدھر اُدھر

دو چار پیگ تجھ کو بُھلانے کے واسطے

ہم جا رہے ہیں پینے پلانے اِدھر اُدھر

پھر اس کے بعد لوٹ کر آئے نہیں کبھی

گھر سے گئے تھے بچے، کمانے اِدھر اُدھر

تُو آ گیا تھا میرے ہدف پر، ہدف نہ تھا

باندھے تبھی تو میں نے نشانے اِدھر اُدھر

ہم لوٹ آئے پھر اسی فٹ پاتھ کی طرف

کب تک بدلتے رہتے ٹھکانے، اِدھر اُدھر

تُو ایک بت نہیں تھا جسے ہم نے چُن لیا

کتنے پڑے ہوئے تھے نجانے، اِدھر اُدھر

دُنیا سے لڑ رہا ہوں میں جس کے یقین پر

وہ چُھپ رہا ہے خود کو بچانے، اِدھر اُدھر

پھوکٹ میں یار وقت گُزاری کے واسطے

جاتا نہیں میں شعر سُنانے، اِدھر اُدھر

قیصر وجدی