الفاظ محترم ہیں کہ نعت نبی کے ہیں

 عارفانہ کلام حمد نعت منقبت

الفاظ محترم ہیں کہ نعتِ نبیﷺ کے ہیں

اوراق اور قلم مِرے سب روشنی کے ہیں

اشکوں سے حرف حرف کا چہرہ دُھلا ہوا

انداز مختلف مِری نامہ بری کے ہیں

ہر سمت چاند اور ستاروں کا ہے ہجوم

منظر کمال آپؐ کی روشن گلی کے ہیں

اللہ کے برگزیدہ رسولوں کی ذات میں

اوصاف جس قدر بھی ہیں میرے نبیؐ کے ہیں

زادِ سفر سنبھال کے رکھو کہ میں چلا

اسباب میرے ساتھ مِری حاضری کے ہیں

کیسے قدم اُٹھاؤں گا شہرِ حضورؐ میں

میرے تمام رابطے وارفتگی کے ہیں

آقاﷺ حضور، اجلی سحر کی تلاش میں

سورج پہ ہاتھ آج بھی تیرہ شبی کے ہیں

مجھ کو ہے حکم آگ کی بارش میں چپ رہوں

آقاﷺ، یہ سانحات مِری بے بسی کے ہیں

یہ تو خدا کے فضل پہ ہے منحصر ریاض

پروانۂ نجات، عمل کب کسی کے ہیں

ریاض حسین چودھری