یہ مسئلہ رہا ہے ذرا دل حضور کا

 یہ مسئلہ رہا ہے ذرا دل حضوُر کا

دِکھتا تھا صاف صاف جو منظر تھا دُور کا

عورت کو دیکھیۓ کبھی اندر کی آنکھ سے

پھر تذکرہ کریں گے پلٹ کر نہ حُور کا

جس کا ہے اختیار، سزا بھی اُسی کی ہو

اُلجھا ہوا سوال نہیں یاں قصور کا

سادہ دِلانِ شہر سے وعدہ نہ کر کوئی

تا عمر انتظار کریں گے ظہور کا

ہم مُبتدی ہیں عِلم میں فن میں زبان میں

اُٹھتا نہیں سوال کہیں بھی عبور کا

پیڑوں سے جانور سے زمیں سے یہ التفات

یہ ارتقاء نہیں ہے تو کیا ہے شعور کا

نام و نسب پہ اپنے جو نازاں ہیں آج آپ

اِبلیس مُرتکب تھا کہاں اس غرور کا

نمرہ شکیل