محبت میں عقیدے کی پذیرائی ضروری ہے

 عارفانہ کلام حمد نعت منقبت

محبت میں عقیدے کی پذیرائی ضروری ہے

محمدﷺ کے لیے لفظوں میں سچائی ضروری ہے

ہو اتنی تاب اِن آنکھوں میں ان کا دیکھ لوں روضہ

مگر اس کے لیے آنکھوں میں بینائی ضروری ہے

میں اس سے پہلے کہ آباد کر لوں قبر کا گوشہ

مجھے اک بار پھر کعبے کی انگنائی ضروری ہے

مِری کوشش یہی ہے نعت میں خوشبو ہی خوشبو ہو

تو یہ معلوم ہو جذبوں میں رعنائی ضروری ہے

نہ جانے کب بلائیں گے مجھے آقاﷺ مدینے میں

نہ جانے کب تلک مجھ پر شکیبائی ضروری ہے

بہت بیمار ہے دل سبز گنبد کی زیارت کا

کرم سرکارؐ اس دل کی مسیحائی ضروری ہے

محمدﷺ اور ان کی آل سے کیجے وفاداری

عقیدت کے سمندر میں یہ گہرائی ضروری ہے

خموشی اچھی ہے لیکن یہ فرمانِ محمدﷺ ہے

اگر حق پر ہو تم مینا تو گویائی ضروری ہے

مینا نقوی