جھکی ہوئی یہ جبیں ہے حضور دیکھیں نا

 عارفانہ کلام حمد نعت منقبت

جھکی ہوئی یہ جبیں ہے، حضورﷺ دیکھیں نا

ہمارا قلبِ حزیں ہے، حضورﷺ دیکھیں نا

کسی کا کوئی تو ہوتا ہے اتنے لوگوں میں

ہمارا کوئی نہیں ہے، حضورﷺ دیکھیں نا

ہماری آنکھ میں خوشیوں کا رقص ہوتا تھا

اب ان میں درد مکیں ہے، حضورؐ دیکھیں نا

ہمیں نکالا گیا پہلے آسمانوں سے

اور اب تو تنگ زمیں ہے، حضورؐ دیکھیں نا

دلِ حزیں کا فقط آپﷺ کی نظر کے سِوا

کوئی علاج نہیں ہے، حضورﷺ دیکھیں نا

حضورﷺ کوئی نہیں آپ کے سِوا میرا

حضور کوئی نہیں ہے، حضورﷺ دیکھیں نا

دانش اعجاز