کیا عشقِ صادقین پہ فیضان نعت ہے

 عارفانہ کلام حمد نعت منقبت

کیا عشقِ صادقین پہ فیضانِ نعت ہے

لولو ہیں اشک ہونٹوں پہ مرجانِ نعت ہے

واللّه! یہ درودﷺ ہی کاشانِ نعت ہے

خاصائے عاشقان ہی ایقانِ نعت ہے

عشّاقِ حق کے دل پہ ہے اشعار کا نزول

باران نعت ہے کہ یہ رمضانِ نعت ہے

ہے نعت پاک نغمۂ توحید کی اساس

بد بخت و بد نما ہے جو انجانِ نعت ہے

زیبا ہے کس کو منصب محبوبؐ کِبریا

سلطانِ دو جہانﷺ ہی سلطانِ نعت ہے

خنجر ہے نعت مشرکِ بے دِین کے لیے

حلقومِ کفر کے لیے پیکانِ نعت ہے

حمدِ خدا کے بعد کرو ذکر مصطفیٰﷺ

ذکرِ علیؑ تو شمعِ شبستانِ نعت ہے

مجنون ہوں محبتِ خیرالوریٰؐ میں یوں

وِجدان رُوح و قلب کو عرفانِ نعت ہے

ہر شعبۂ حیات میں حمدِ خدا ملے

"ہر شعبۂ حیات میں امکانِ نعت ہے "

عالی! سلام پیش کرو اہلِ بَیت کو

میرے خیال میں یہی شایانِ نعت ہے

شائستہ کنول عالی