رخسار سلامت ترے مژگان سلامت

 رُخسار سلامت تِرے مژگان سلامت

اے شوخ! تِری زُلفِ پریشان سلامت

قربان میں خوش باش کی ہر فتنہ گری پر 

خوش حال مِرا، دلبر و جانان سلامت 

جچتا ہے اسی خوب کو یوں خندۂ بسیار 

وہ ساغر و مِینا لبِ خندان سلامت 

اس گُل کی جوانی کو بھلا کیسی ہزیمت

رکھتی ہو جسے ہر گلِ گُلدان سلامت   

پھرتا ہے تِرے شہر میں دیوانہ کہیں کا 

دامن ہے سلامت، نہ گریبان سلامت 

اس خلوتِ آسیبِ شبستاں کی سدا خیر 

صیاد سلامت،۔ مِرا زِندان سلامت

منظر کہ جسے چشمِ ہوس کھوج رہی ہے

رہتا ہے مگر پردۂ عریان سلامت 

ساقی تِری مہمان نوازی ہے غضب کی

کیا خاک رہے گا مِرا ایمان سلامت 

آباد رہیں خوابِ سہولت کی کنیزیں 

اے کاش رہے سحرِ پرستان سلامت

اک آنکھ گرفتار پہ احسان کرے گی

نکلے گا کسی قید سے حیران سلامت  

اِمشب شبِ یلدا ہے محبت سے بسر کر 

رکھنی ہے اگر صُورتِ امکان سلامت 

یہ شدتِ پُرجوش ہے اک قیس کی سُنت 

رکھتا ہے جو ہر حال میں ہیجان سلامت

 

صابر امانی