عارفانہ کلام حمد نعت منقبت
پوشاکِ عمل جامۂ کردار پہن لوں
سر تا بہ قدم اسوۂ سرکارﷺ پہن لوں
ایماں کے لیے حُسنِ عمل بھی ہے ضروری
یہ کیا کہ فقط جُبہ و دستار پہن لوں
آنکھوں میں رہے خاکِ درِ شاہؐ کا سُرمہ
صافے کی جگہ طیبہ کے میں خار پہن لوں
حُرمت تِری قربانیاں مانگے تو میں حاضر
زنجیرِ قضا شوق سے سو بار پہن لوں
کھائی ہے قسم دینِ محمدﷺ سے وفا کی
کیوں طوقِ جبیں سائیِ اغیار پہن لوں
مِل جائے سگِ کوئے محمدﷺ کا گلوبند
مر جاؤں خوشی سے اگر اک بار پہن لوں
طیبہ سے بلاوہ کبھی آئے تو میں کاشر
کچھ ایسے چلوں وقت کی رفتار پہن لوں
شوزیب کاشر
No comments:
Post a Comment