حمد الہ کی گونج ہے اعلان نعت ہے

 عارفانہ کلام حمد نعت منقبت

حمدِ الہ کی گونج ہے، اعلانِ نعت ہے

دنیا خدا کے فضل سے ایوانِ نعت ہے

مولا، عجم کے گُنگ بیاباں میں جا بہ جا

مِدحت کے اِصفہان ہیں، ملتانِ نعت ہے

روشن ہے بابِ شہرِ تمدّن پہ اب چراغ

حدِّ ادب، کہ گوشۂ بُستانِ نعت ہے

زنجیر پڑھ رہی ہے، قصیدے کے بیت و بند

بیمار، نینوا میں نگہ بانِ نعت ہے

رُسوائی کا سبب ہے مگر آپؐ کا غلام

اقبال کے دیار میں امکانِ نعت ہے

دنیا کی واہ واہ سے، بزمِ سخن سے دور

"ہر شعبہ حیات میں امکانِ نعت ہے"

آئے ہر اک گروہ و جماعت کا با شعور

حلقہ تمام حلقۂ مستانِ نعت ہے

احمد جہانگیر