عارفانہ کلام نعتیہ کلام
رُخِ احمدﷺ کو آئینہ بنانے کا خیال آیا
چراغِ بزمِ امکاں کو جلانے کا خیال آیا
حریمِ ناز کے پردے اٹھانے کا خیال آیا
خدا کو نور جب اپنا دکھانے کا خیال آیا
رُخِ احمدﷺ کو آئینہ بنانے کا خیال آیا
انہیں کے واسطے پیدا کیا سارے زمانے کو
انہیںؐ پر ختم فرمایا زمانے کے فسانے کو
سجی بزمِ جہاں محبوب کی عزت بڑھانے کو
سرِ محشر خدائی کو بلا بھیجا دکھانے کو
انہیں جب حشر میں دولہا بنانے کا خیال آیا
بلا کی بھیڑ تھی روزِ قیامت بزمِ محشر میں
نظر آتی تھی ہر سو اک مصیبت بزمِ محشر میں
اِدھر نکلا زباں سے نامِ حضرت بزمِ محشر میں
اِدھر پہونچے گناہگارانِ اُمت بزمِ محشر میں
اُدھر سرکارؐ کو تشریف لانے کا خیال آیا
بُلا کر عرش پر محبوب سے پوچھا گیا مانگو
تمہارے واسطے ہیں دو جہاں اے مصطفیٰؐ مانگو
عطا کر دوں اگر کچھ اور بھی اِس کے سوا مانگو
شبِ اسریٰ کہا خالق نے ہو جو مانگنا، مانگو
نبیﷺ کو اپنی اُمت بخشوانے کا خیال آیا
بھکاری نے جب ان کے اک نظر ان کی طرف دیکھا
بر آئیں آرزوئیں دل کی گر ان کی طرف دیکھا
زباں سے کچھ نہ نکلا تھا مگر ان کی طرف دیکھا
منور میں نے گھبرا کر اِدھر ان کی طرف دیکھا
اُدھر ان کو مِری بگڑی بنانے کا خیال آیا
منور بدایونی
No comments:
Post a Comment