مجذوب صفت رکھتے ہیں کم خواہشِ دنیا
ملتی نہیں دنیا میں ہر آسائشِ دنیا
جس دن سے مِری آنکھ لڑی حسنِ ازل سے
بھاتی نہیں آرائش و زیبائشِ دنیا
افسانۂ تازہ نہیں کج خُلقیِ انساں
بنیاد سے بے ڈھنگ ہے افزائشِ دنیا
تخمینہ لگاتا ہے کوئی چشمِ زدن میں
یکبارگی کر جاتا ہے پیمائشِ دنیا
مشتاق ہیں پاکیزگیِ خُلدِ بریں کے
جو لوگ ہیں مستغرقِ آلائشِ دنیا
یہ نظمِ جہاں غیر منظّم ہے سو ہم پر
واضح نہیں کچھ مقصدِ پیدائشِ دنیا
جنت میں اُداسی کا یہ عالم ہے کہ رب سے
ہم بارِ دگر کرتے ہیں فرمائشِ دنیا
دل دنیا میں کچھ اور سماتا نہیں عاجز
اک عشق سے زائد نہیں گنجائشِ دنیا
بلال عاجز
No comments:
Post a Comment