راحتیں طول مرض کی صرف درماں ہو گئیں

راحتیں طولِ مرض کی صَرفِ درماں ہو گئیں

زندگی جن مشکلوں سے تھی وہ آساں ہو گئیں

صورتیں امید کی خوابِ پریشاں ہو گئیں

سامنے آنکھوں کے آئیں اور پنہاں ہو گئیں

ان سے کیا لطفِ تعلق ان سے کیا دل بستگی

غیر کے ماتم میں جو زلفیں پریشاں ہو گئیں

ناخن وحشت نے سینے پر جو کیں گلکاریاں

فصلِ گل میں زینتِ چاکِ گریباں ہو گئیں

سیکڑوں رخنے کیے پیدا در و دیوار میں

شوق کی نظریں رقیب چشم درباں ہو گئیں

بے مرمت سی جو قبریں کوچۂ وحشت میں تھیں

وہ بھی آخر صَرفِ استحکامِ زنداں ہو گئیں

کھل گئے چینِ جبیں سے ان کی بدخوابی کے بھید

جن اداؤں کو چھپاتے تھے نمایاں ہو گئیں

دل میں اب کیا رہ گیا ہے، نا امیدی کے سوا

آرزوئیں خون ہو کر نذرِ مِژگاں ہو گئیں

چند باتیں وہ جو ہم رِندوں میں تھیں ضرب المثل

اب سنا مرزاؔ کہ وردِ اہلِ عرفاں ہو گئیں

مرزا ہادی رسوا