فاران کی چوٹی پر چمکا خورشید رسالت کیا کہنا

عارفانہ کلام حمد نعت منقبت 

فاران کی چوٹی پر چمکا خورشیدِ رسالتﷺ کیا کہنا

ایمان کی کرنوں سے پھیلی ہر سمت حرارت کیا کہنا

وہ عین جمالِ حُسنِ ازل نکھرا ہے بہ شکلِ ختمِ رُسلﷺ

روشن ہیں عرب کے دشت و جبل یہ نُور کی کثرت کیا کہنا

وہ عالمِ ہُو، جلووں میں عُلو، غُنچوں میں سبُو، ہر شے میں نمُو

شبنم سے کیا جاتا ہے وضُو، یہ بارشِ رحمت کیا کہنا

جلووں کے یہ کس کے پائی جھلک، سجدے میں گِرے سب جن و ملک

شاداں ہے زمیں، حیراں ہے فلک، انسان کی قسمت کیا کہنا

وہ منبعِ نُور و صِدق و صفا، وہ مخزنِ لُطف و جُود و عطا

بٹتی ہے جہاں ہر صُبح و مسا، ایمان کی دولت کیا کہنا

وہ نُورِ ہُدیٰ، محبُوبِ خُدا، حق جن پہ فدا، جو حق پہ فدا

وہ محفلِ ناز و حُسن و ادا، وہ گرمئ اُلفت کیا کہنا

اے کاش کہیں فرمانِ حزیں رکھ پائے درِ مولا پہ جبیں

پھر نعت کی کثرت کیا کہنا، اشعار کی لذت کیا کہنا

فرمان فتحپوری