شفاعت
تپش کی فضا ہے
ذرا سی بلندی پہ وحشی الاؤ جلایا گیا ہے
پرانی سی مٹی کا ادنٰی سا ڈھیلا
کسی آتشی دھات سے پُر زمیں پر پڑا سوچتا ہے
کہ اس کا دوامی ٹھکانہ کہاں ہے
وہ کیا اب ہمیشہ تپش کے تنوروں کا ایندھن بنے گا
اسی بات کا خوف اندر سے بھی اس کو جھلسا رہا ہے
تپش ہی تپش ہے
جلن ہی جلن ہے
مگر وہ جلن کو سہے جا رہا ہے
بس امید کی اک کرن کے بھروسے
کہ شاید اچانک بدل جائے منظر
کہ شاید یکایک کرامت ہو ظاہر
جو وحشی الاؤ کو رحمت بنا دے
تپش کو مٹا دے
فضائیں سجا دے
جو مٹی کے ڈھیلے کو پُر نور کر کے
اسے ایک روشن ستارہ بنا دے
پھر اس کو دوامی فلک پر سجا دے
پرانی سی مٹی کا ادنٰی سا ڈھیلا
زمانے سے ہے منتظر اس گھڑی کا
کہ بدلے نظارہ
کرامت ہو ظاہر
اٹھیں اس کی جانب
وہ راحم نگاہیں
عبیدالرحمٰن نیازی
No comments:
Post a Comment